《ꅇꏀꁧꀿ》

ꆈꌠꅇꂷꁰꁱꐩꋊꇬ，ꐥꇐꋍꑞꋍꑵꅐꀦꅐꀿꆹꌌꐥꇐꀑꇬꌧꃆꀋꉬꀋꉆꐘꃅꉜꄉꉉꁱꄉꌠꉬ。ꅺꌡꇬ，ꐩ、ꈾꁧꀿꐥ，ꌩ、ꂷꁧꀿꐥ，ꑌ、ꑿꁧꀿꐥ，ꃮ、ꃬꁧꀿꐥ，ꒉ、ꄔꁧꀿꐥ，ꌦ、ꆅꁧꀿꐥ……ꀑꐱꃅꉉꇬꆏ，《ꅺꊈ》ꑌ“ꁧꀿ”，《ꂘꃅ》ꑌ“ꁧꀿ”，ꐮꐯꃅꇬ“ꁧꀿ”ꆹꁰꏦꑵꐛꀐꌠ。 

   ꃅꋊꃅꌋꑍꇁꌋꀋꐥꃅꇬꊎꐛꐈꇬꎷ，ꆈꌠꅇꂷꁱꂷꑌꄚꐊꄉꐛꏀꁏꅷꇁꇬꎷꌠ。ꇩꏤꐛꏀꁏ，ꊿꋅꐛꏀꁏ，ꃅꈋꃄꏦꐛꏀꁎꇰꃲ，ꐩꋊꄙꇁꃪꈎꎵꑳꀕꌠꆈꌠꊿꋅꅇꂷꁱꂷꑌꄚꐊꐛꐈ、ꐛꒆ、ꐞꄿꆸꎂꀕ。ꆈꌠꅇꂷꁱꂷꐩꋊꇬ，ꀒꋏꀎꆹꃅꃴꃄꄅꁉ、ꐧꋉꈲꏿ、ꈔꃆꄴꏮ、ꈭꂘꈜꂘ、ꋦꁍꋈꄻ，ꀊꄙꀊꉐꈎꃅꄛꁮꀕꅡꊪꀕꃅꁍꇩꑾꌋꈤꏭꋦꅷꇁꌠ。ꆈꌠꇐꀳꇬ“ꇗꅉꑞꅐꆏꃰꊿꑞꌬ，ꁬꏜꑞꅐꆏꑌꑿꑞꋠ”ꄷ，ꃅꋊꀊꏀꋋꋏꇬꆏ，ꆈꌠꅇꂷꁱꂷꀻꎆꐩꋊꇬ，ꅇꏀꉐꏀꇓꁨꀖꃅꀖꄮꑟꀐ。

    ꋍꑵꌠꆏ，ꀃꑍꋋꄮꇩꈐꇩꉈꍔꍞ、ꎆꏣ、ꂽꑘ、ꉇꉻꌤꑘꑠꃆꂮꅇꏀꉐꏀꀋꃷꎵꃅꅐꇁꇰ，ꋋꇅꃅꁎꆦ、ꄺꑻꌊꆈꌠꅇꂷꁱꂷꐛꄉ，ꆈꌠꏓꂱꁳꉪꇩꏤꃅꋊꐛꏀꁏ、ꐥꋊꀊꏀꂿꃆꄜꆹꎻ，ꑠꃅꑲꆀ，ꃶꐚꃅꇩꏤꋧꃅꇣꄧꃅꐞꄿꂴꅑꎍꑠꂷꅿꏓꂱꐛꄎꌠ。

    ꑍꑵꌠꆏ，ꉪꇩꏤꀻꎆꌠꇬꐊꄉ，ꇩꈐꇩꉈ、ꁭꅐꁮꐚ、ꀊꆨꀋꃅꋧꃅꇣꄧꐧꇁꃰꊿꁧꀿ、ꀹꄻꅐꇁꌠꐩꋊꁰꁱꍸꇐꂒꉻꌋꆀꈻꇐꑠꁎꆦ、ꏓꄻ、ꎥꃪꅐꇁ，ꆈꌠꅇꂷꁱꂷꁳꇩꏤꐩꋊꀻꎆꅉꃀꇬꐊꆹꎻ。ꉪꇩꏤꁳꃶꐚꀕꃅꊿꋅꀉꑌ、ꅇꂷꁱꂷꀉꑌ、ꃰꊿꐥꋊꌧꑳꅉꃀꅡꊪꀕ，ꄷꀋꁧꊋꏓꋯꑌ、ꊋꇨꁉꃑ、ꐥꋊꎵꑳꀕꑠꂷꐛꆹꎻ。

    ꌕꑵꌠꆏ，ꆈꌠꅇꂷꁱꂷꋧꃅꇣꄧꁱꇐꐩꋊꐊꄉꀻꎆꇈꀋꑍꀋꈤꂿꄷꇬ，ꀋꃅꋋꋏꌋꆀꃆꏂꊂꑋꈆꑪꌧꇐꂿꇐ、ꌧꋲꂿꋲ、ꅇꏀꉐꏀꑠꁎꆦ、ꋈꄻꄉꌬꄡꑟ。ꀊꆨꐩꋊꂿꇐ、ꌦꅇꌋꅅꉪꇐ、ꂿꑘꆫꑘꌧꇐ、ꀑꇬꐥꇐꑠꃆꂮꀉꄂꌧꁱꀋꉆꀐꌠꉬ。

    ꇖꑵꌠꆏ，ꆈꌠꅇꂷꁱꂷꐥꋊꏀꀺꇬ，ꆈꌠꅇꂷꁱꂷꋊꃅꌫꏦ，ꆈꌠꐩꋊꀻꎆꏥꏦ，ꆈꌠꊿꋅꐥꋊꈲꁧꑠꇬꋭꋽ、ꎃꊒꃅꐙꑲꆀ，ꐩꋊꎵꑳꀕ，ꏂꀨꄄꍅꀕ，ꋧꃅꇣꄧꃅꈨꈴꌠꅇꂷꁱꂷꑠꑵꌬꈧ、ꁰꄻꅷꁧꄎꌠꉬ。

    ꉬꑵꌠꆏ，ꆈꌠꅇꂷꁱꂷꆹ，ꉪꇩꏤꀻꎆꐞꄿ、ꌣꈚꐛꏀꁏꌠꄇꈜꇬꐊꄉ，ꇩꏤꁰꁱꐩꋊ、ꇩꏤꉌꊋꅉꃀ、ꇩꏤꊫꂫꉪꇐ、ꇩꏤꋧꃅꂿꃆꑠꏂꇫ、ꉪꈾ、ꃅꑽꅈꇬꐊꆹ，ꄷꀋꁧꑅꅐꊋꆜꄡꑟꌠ。

    ꄚꉎꋋꉬꑵꃶꐚꀕꃅꇬꅜꇫꑟ、ꇫꁻꇬꌶ，ꍟꑌꐴꀋꄓ，ꄳꑌꀍꀋꉞꃅ，ꋭꋽꇐꑌꃅꐩꋊꀻꎆꄇꈜꇬꐊꆹꎻ，ꇷꄙꊋꌬꃅꇩꏤꃅꋊꀊꏀꂿꃆꏂꇫ、ꀵꄜꌊꊂꑋꄇꈜꊫꂫꁨꇉꀕꌠꀹꄻꆹ。ꑠꃅꑲꆀ，ꊿꋅꀻꎆꈝꃀꑌꈳꅉꎳꅉꑟ，ꆈꌠꅇꂷꁱꂷꐩꋊꈴꈜꑌꈳꅉꐼꅉꑟ，ꊿꋅꀑꁮꐨꇣꋲꌠꌌꁍꇩꋈꄻꌠꑌꌫꅉꈉꅉꑞꎂꀕ。ꑠꅹ，ꅇꏀꁧꀿꌤꑘꆹꐩꋊꐛꏀꁎꄮꈒꇙꊋꃤꀋꂿꑘꑵꉬꌠꑓꀠꀕ。